娛樂喧

忽然回顧

媽咪姐

出外埠

揞名爆

靚抽王

單人訪

名人潮

歐洋風

韓氣逼人

娛樂講呢啲

歐洋風

好戲總在後頭

從細到大,尤其鍾意荷里活電影;入行以文字為生亦絕非偶然,能夠將兩者結合為一,可以話係夢想成真。
由 2004年開始擔任外娛版主,因利乘便率先睇最新嘅電影,寫喜歡嘅明星;中途曾諗過放棄,甚至連撰文一欄都唔願意填上自己嘅名。
慶幸 11年來喜大於悲,爛戲確係睇過唔少,但好嘅電影永遠陸續有嚟,期望有一日再同大家「食住花生睇好戲」。

第一次獻俾喼神

日期: 2004年 4月 2日
外娛係《忽周》改革下嘅產物,啱啱入行嘅我走馬上任成為版主。第一次寫嘅,就係米路吉遜( Mel Gibson)嘅《受難曲》。
佢嘅作品,一直唔係我杯茶,但好欣賞佢愈惹火愈要拍嘅精神。結果 2006年,喼神醉酒下發表反猶太言論,全身「着晒火」兼被封殺。直至今時今日,都仍然未翻身得晒。

喼神近年少拍戲,近作有同史泰龍合作嘅《轟天猛將 3》。

我仲受緊難呀!(設計對白)

寫得最多係邊個?

根據個人非正式統計,本欄寫得最多嘅,應該係畢彼特( Brad Pitt)、安祖蓮娜( Angelina Jolie)呢對荷里活夫婦。
單係佢哋同珍妮花安妮斯頓( Jennifer Aniston)嘅三角情仇,已經講足成個世紀咁耐;加上安祖蓮娜唔係收養細路就係生仔,以每多一個人口一篇報道計,再加埋畢安拍戲、攞獎嘅次數,有理由相信,佢哋係本書曝光率最高嘅外國明星。

第一位
以人頭計,無得輸。

畢安同前畢太珍妮花安妮斯頓嘅三角情仇糾纏不清,每逢畢安嗌交、傳偷食,又或者珍妮花有新戀情,都會將三人嘅恩怨重炒一次。

第二位

現任 model女友 Kelly Rohrbach

荷里活「情場鬼見愁」里安納度喺過去 11年有 6任女友,非正式嘅多如恒河沙數,報道篇幅都唔少㗎!

第三位

由《哈利波特:阿茲卡班的逃犯》開始至大結局, total 6集,每集至少介紹一次,再加埋呢幾個主角嘅花邊新聞,可以話係《忽周》常客。

外娛都可以惹官非?

日期: 2005年 5月 6日
前線新聞承受嘅法律風險比外娛大,但都有例外。一篇講湯告魯斯( Tom Cruise)撻着姬蒂賀姆絲( Katie Holmes)嘅報道,就因為一張相而惹官非。好彩係最後打得甩,唔好彩係湯佬最終同姬蒂閃分,於 2012年結束 6年婚姻。

雖然得以平反,但為免出事,都係黑格穩陣啲。

新作《職業特工隊 5:叛逆帝國》大收,相傳湯佬亦撻着酷似前妻嘅 22歲女助手,事業愛情皆得意。

姬蒂同湯佬育有一女 Suri,不過撫養權歸女方。

介紹冇上畫嘅電影

日期: 2004年 7月 30日
2004年暑假檔曾介紹《天魔特攻》( Hellboy),點知最後冇喺香港上映,第一次感覺咁𤓓。後來得知電影檔期經常變,上畫與不上畫,見怪不怪,本人嘅面皮亦練得成尺咁厚。

妙麗惹的禍

戇居的事十常八九, google自己都算一則,話說當年只得 15歲嘅「妙麗」愛瑪華生( Emma Watson)被揭未成年飲酒,我亦查證外國網站後寫成報道。事後 google自己嘅同時,竟發現有「妙麗」粉絲點名批評,兼且一大堆人身攻擊。
查實「妙麗」出道以嚟都冇申請貞節牌坊或者發誓做一世玉女,俾粉絲硬框做乖乖女都幾無奈。不過明白粉絲只係維護偶像,問心無愧就算了。

2006年流出一批「妙麗」飲酒同攬仔嘅相,為數唔止一張,可能全部都係 props啩!

下刪無數咁多人身攻擊……

小丑最令人懷念

自問不是一個感情豐富嘅人,處理死人稿尤其辛苦。記得第一次面對嘅已故巨星,就係馬龍白蘭度( Marlon Brando)。雖然只係負責資料搜集,但對於當時只係一個死𡃁妹而言,要去了解唔係自己年代嘅人和事,係有難度嘅。大佬,我當時連《教父》都未睇過呀!
而講到個人最懷念應該係「小丑」希思萊傑( Heath Ledger),寫嘅時候無端端眼濕濕,不過到後期嘅 MJ,菲臘西摩荷夫曼( Philip Seymore Hoffman)都再冇咁強嘅感受。

馬龍白蘭度 2004年逝世

希思萊傑 2008年逝世

米高積遜 2009年逝世

奧斯卡與我

第一套深深打動我嘅電影係《阿甘正傳》,當時喜歡男主角湯漢斯( Tom Hanks),仲追埋奧斯卡睇佢點封帝。自此之後,睇奧斯卡成為每一年嘅指定動作。不過做外娛後,每次睇完直播都要返公司趕稿。如今無事一身輕,下一年奧斯卡,相信會好不捨,好唔習慣。

2015年第 87屆奧斯卡,《忽周》最後一期奧斯卡。

2005年第一次介紹奧斯卡,占美霍士憑《 Ray》封帝。

撰文:陳盛怡